Nënkryetarja e Kuvendit të Kosovës nga radhët e Lëvizjes Vetëvendosje, Albulena Haxhiu, ka konfirmuar se Albin Kurti do të jetë mandatari i tyre për Kryeministër pas konstituimit të Kuvendit, derisa ka treguar edhe mënyrat se do të përpiqen t’i bëjnë 61 votat për formimin e Qeverisë së re, duke llogaritur në deputetë të subjekteve të tjera politike.
“Mund të ketë deputetë që janë nga grupet tjera parlamentare apo nga subjektet politike dhe në anën tjetër mund të ketë edhe subjekte politike. Ju e dini që ne kemi pasur përpjekje që të bëjmë koalicion me LDK-në, asokohe jemi refuzuar, ka pasur përpjekje ose vullnet që të kemi koalicion me Nismën, nuk kanë shprehur vullnet”, deklaroi Haxhiu për gazetarë pas senacës konstituive.
Ajo është shprehur se është e lumtur me faktin që Kuvendi është konstituuar, por tha se e habit qëndrimi i PDK-së në lidhje me votimin për përfaqësuesit e Listës Serbe.
“Për mua është i habitshëm qëndrimi i PDK-së, pra ata nuk patën votë kundër Listës Serbe, prandaj uroj që ta sqarojnë qëndrimin e tyre sepse sot të gjithë bashkë është dashur që të jemi në të njëjtën linjë, pra që të kontribuojmë ne konsitituimin e Kuvendit të Kosovës, por që të mos lejojmë assesi qëndrime jo të qarta në lidhje me Listën Serbe duke pasur parasysh se Lista Serbe dirigjohet nga Beogradi”, shtoi.
Ajo edhe ka pretenduar se PDK-ja është përpjekur që ta pengojë konstituimin e Kuvendit edhe në seancën e së premtes.
“Sot, sërish, me qëndrimet e tyre (PDK) tentuan ta pengojnë konstituimin e Kuvendit, por fat i mirë që kjo nuk ndodhi”, deklaroi ajo, derisa përjashtoi çfarëdo mundësie për koalicion me PDK-në.
“Por, duke qenë se sot u konstitua Kuvendi plotësisht, ne do të vazhdojmë konsultimet me të gjitha partitë. Jo këtu PDK-në dhe jo këtu Listën Serbe, por nuk përjashtoj deputetë nga partitë tjera politike”, potencoi Haxhiu.
