Kosova u mposht 4:0 në ndeshjen kundër Zvicrës, e vlefshme për kualifikimet për Botërorin 2026.
Zvicra e dominoi totalisht ndeshjen. Vetëm në pjesën e parë shënoi katër gola. Në pjesën e dytë nuk pati gola.
Në minutën e 22-të, për helvetikët shënoi me kokë Manuel Akanji, pas një ndërprerjeje nga këndi. Për 2:0, vetëm pas tre minutash, u përkujdes qendërsulmuesi Breel Embolo, ndërsa golin e tretë e shënoi Silvan Widmer në minutën e 39-të. Golin e katërt dhe të dytin personal e shënoi Embolo në minutën e 45-të.
Kjo është ndeshja e parë e Kosovës në kuadër të kualifikimeve për Kampionatin Botëror që do të mbahet në vitin 2026 në SHBA, Kanada dhe Meksikë.
Ndeshjen e dytë, Kosova do ta luajë pas dy ditësh në stadiumin “Fadil Vokrri” në Prishtinë, kundër Suedisë.
