Individë të arrestuar për keqpërdorim të detyrës zyrtare e militantë partiakë janë propozuar nga Qeveria e Kosovës për drejtorë në Bordin e Agjencisë Kosovare të Privatizimit. Hekuran Nikçi, Blerina Batusha – Xërxa, Mersiha Kaja, Berat Isa, Arbër Gorani, Atdhe Hykolli e Feim Kelmendi janë emrat që Qeveria Kurti synon t’i rehatojë në përbërjen e Bordit të AKP-së.

DOKUMENT:

Si kryeinspektor i Inspektoratit të Punës, Hekuran Nikçi ishte arrestuar në mars të 2025-tës nën dyshimin për tri vepra penale: Keqpërdorim i pozitës apo autoritetit zyrtar, Cenim i të drejtave nga marrëdhënia e punës dhe Përdorim i paautorizuar i pasurisë.

I njëjti ishte përfshirë në një mori skandalesh gjatë kohës sa ushtronte këtë pozitë. Në një rast, Nikçi kishte qortuar Kryeinspektorin e Mitrovicës, Nexhat Fazliu, pasi ky kishte ndihmuar Prokurorinë për të gjurmuar lidhjet kriminale të kompanisë së terroristit serb, Milan Radojiçiç.

Hekuran Nikçi.

Një tjetër figurë e komprometuar dhe nën hetime për keqpërdorime është Feim Kelmendi, një person i afërt i Vetëvendosjes, i rehatuar nga pushteti në Telekomin e Kosovës si Zyrtar Kryesor i Financave
dhe Thesarit.

Feim Kelmendi dhe Albin Kurti

Kelmendi është intervistuar disa herë nga Prokuroria Speciale nën dyshimin për “keqpërdorim të detyrës zyrtare” dhe për “cenim të të drejtave në marrëdhëniet e punës”.

DOKUMENT:

Kelmendi, VOX Kosovës i tha se u kontaktua nga Qeveria “për t’ia marrë mendimin”, por s’e di se është propozuar.

“Nuk jam në dijeni që jam propozuar. Por e konfirmoj që jam kontaktuar nga Qeveria për të marrë qëndrimin tim nëse pajtohem me propozimin”, tha.

Deputetja e LDK-së, Janina Ymeri, tha se votimi për anëtarë të Bordit të AKP-së në Komision ka qenë “pa plan” dhe të propozuarit “janë votuar nga Vetëvendosje pa CV-të dhe njohuritë zyrtare për ta”.

Ajo tha se ka informuar Prokurorinë për emrat e propozuar.

“Me vonë, gjatë ditës kam marr informata shqetësuese të natyrës penale rreth disa të të propozuarve për këtë bord dhe kam dërguar kërkesë në adresën e Prokurorisë së Shtetit dhe Prokurorisë Speciale për të verifikuar statusin penal të të gjithë anëtarëve të Bordit”, shkroi deputetja.

Sa ishte në opozitë, tash kryeministri i vendit, Albin Kurti, një nga pikat kryesore të premtimeve elektorale e ka pasur mbylljen e Agjencisë Kosovare të Privatizimit.

“AKP-ja, kemi thënë se do të shuhet. Dhe do të shuhet”, deklaronte Kurti më 27 maj të vitit 2021 në Kuvendin e Kosovës.

“AKP-ja do të shuhet dhe do të formohet Fondi Sovran”, shtonte ai.

Në pushtet me Kurtin në krye, s’kishte ndodhur as njëra as tjetra. Ndër vite, Agjencia Kosovare e Privatizimit është transformuar në çerdhe të punësimeve partiake, për të cilat VOX Kosova ka raportuar në vazhdimësi.