Sekretari Amerikan i Shtetit, Marco Rubio, ka thënë se javën e ardhshme do të zhvillojë takime me zyrtarë të Danimarkës rreth ambicieve të presidentit amerikan, Donald Trump, për të përvetësuar territorin e saj autonom, Grenlandën.
Rubio deklaroi se nuk kanë shqyrtuar opsione për mënyrën se si do të marrin nën kontroll territorin, por tha se presidenti amerikan gjithherë ruan mundësinë e përdorimit të forcës kur e sheh të arsyeshme.
“Çdo president, jo vetëm ky president, çdo president ruan opsionin. Nuk po flas për Grenlandën, po flas globalisht. Nëse presidenti identifikon ndonjë kërcënim për sigurinë kombëtare të Shteteve të Bashkuara, çdo president ruan mundësinë për ta zgjidhur me mjete ushtarake”, ka thënë Rubio.
Presidenti amerikan Donald Trump ka shfaqur interesim, qysh prej mandatit të tij të parë, pë të përvetësuar territorin e Grenlandës, por retorika e tij është intensifikuar kohëve të fundit. Ai po arsyeton përvetësimin e Grenlandës si shumë të rëndësishëm për sigurinë kombëtare të SHBA-së, pasi thotë se Danimarka ka dështuar ta mbrojë ishullin arktik nga influenca ruse dhe kineze.
