Policia e Serbisë ka arrestuar një person (77-vjeçar) në pikën kufitare mes Kosovës dhe Serbisë, Merdare, nën dyshimin për krime lufte gjatë luftës së fundit në Kosovë.
Në njoftimin e Ministrisë së Punëve të Brendshme të Serbisë thuhet se i arrestuari është H.H, i lindur në vitin 1948, nacionalitetin e të cilit nuk e ka bërë publik.
Ata pretendojnë se i arrestuari, “në qershor të vitit 1999, në Podujevë, në bashkëkryerje me disa pjesëtarë të UÇK-së, me armë zjarri ka privuar nga jeta një civil të kombësisë serbe”.
Të dyshuarit i është caktuar masa e ndalimit 48 orë, “pas së cilës, së bashku me kallëzim penal, do të dërgohet në Prokurorinë Publike për Krime Lufte”.
