Besnik Bislimi, zëvendëskryeministër në detyrë i Kosovës, qëndrimin e Lidhjes Demokratike të Kosovës se ai nuk ka legjitimitet për ta përfaqësuar Kosovën në dialogun me Serbinë e ka quajtur “budallëk” dhe “të palogjikshëm”.
Këto komente, Bislimi i ka bërë pas takimit që ka pasur me kryengeociatorin serb, Petar Petkoviç, në Bruksel nën ndërmjetësimin e të Dërguarit Special të Bashkimit Evropian për dialogun Kosovë-Serbi, Peter Sorensen.
“Pak është interesant që ky budallëk ka mbërri edhe në Bruksel. Unë jam zëvendëskryeministër në detyrë i Qeverisë së Kosovës, i ngarkuar mes tjerash edhe me temën e dialogut”, tha Bislimi para gazetarëve.
Ai theksoi se mandatin ia ka dhënë qeveria dhe se vetëm ajo mund të ia marrë. “Nuk ma ka dhënë Lidhja Demokratike e Kosovës, as nuk mundet të ma marrë Lidhja Demokratike e Kosovës”.
“Andaj, gjithçka tjetër është e palogjikshme, ngjashëm me shumicën e qëndrimeve të këtij subjekti politik dhe subjekteve tjera që po i hasim në muajt e fundit”, shtoi.
