Kryetari i Bashkimit Demokratik për Integrim (BDI), Ali Ahmeti, ka deklaruar se pa shqiptarët nuk ka as Maqedoni të Veriut dhe se nuk do të lejohet kthimi prapa në të drejtat e fituara me Marrëveshjen e Ohrit (gusht 2001).
“Pa shqiptarë s’ka Maqedoni. Kjo është shumë e vërtetë. Marrëveshja e Ohrit e shpëtoi Maqedoninë. Dhe, Marrëveshjes së Ohrit, më zot duhet t’i dalin maqedonasit sesa ne shqiptarët”, tha Ahmeti gjatë një aktiviteti për shënimin e 24-vjetorit të marrëveshjes që i dha fund luftës së vitit 2001.
Sipas tij, me qeverinë aktuale në RMV, të drejtuar nga Hristjan Mickoski, shqiptarët po përballen “me poshtërim”, gjë që, nëse vazhdon, ai vlerëson se do të dëmtojë edhe komunitetin maqedonas. “Po u kthyem pas, nuk është mirë për komunitetin maqedonas. Jo për ne, për ata nuk është mirë,” u shpreh ai.
