Presidentja e Kosovës, Vjosa Osmani, ka përshëndetur marrëveshjen e paqes në mes të Izraelit dhe Hamasit.
Përmes një postimin në platformën X, Omani ka përshëndetur angazhimin e Presidentit të Shteteve të Bashkuara të Amerikës në arritjen e paqes.
“Presidenti Donald Trump dhe administrata e tij kanë treguar udhëheqje të vërtetë dhe përkushtim për të sjellë paqe të qëndrueshme si për izraelitët ashtu edhe për palestinezët, si dhe përkushtim të palodhur për t’i dhënë fund vuajtjeve që breza të tërë njerëzish të pafajshëm kanë përjetuar”, shkroi ajo.
Ajo shprehu mirënjohje edhe për ndërmjetësuesit nga Katari, Egjipti dhe Turqia për përkushtimin e tyre të vazhdueshëm.
Izraeli dhe Hamasi kanë rënë dakord të enjten për fazën e parë të një armëpushimi të ndërmjetësuar nga SHBA, që do të mundësojë lirimin e shpejtë të të gjithë pengjeve që mbahen në Gaza, tërheqjen e forcave izraelite deri në një pikë të dakorduar dhe lirimin e disa të burgosurve palestinezë.
Presidenti Trump tha se pengjet ka gjasa të lirohen të hënën, shkruan CNN.
Njoftimi i tij për marrëveshjen nuk trajtoi disa çështje të pazgjidhura në propozim, përfshirë çarmatimin e Hamasit dhe qeverisjen e ardhshme të Gazës.
Kryeministri izraelit Benjamin Netanyahu e quajti marrëveshjen një “sukses diplomatik dhe fitore kombëtare e morale” për vendin e tij. Hamasi falënderoi Trump-in dhe të gjithë ndërmjetësuesit e përfshirë: Katarin, Egjiptin dhe Turqinë.
