“Do të ketë shumë prej emrave të cilët tashmë i kam prezantuar edhe unë edhe Glauk Konjufca në vjeshtën e vitit të kaluar. Mirëpo nuk do të jenë identikë”, ka deklaruar Albin Kurti kur është pyetur për përbërjen e kabinetit të ri qeverisës në një prononcim për gazetar nga Podujeva, derisa për presidenten/in e ri sërish nuk dha përgjigje të qartë.
Formimi i qeverisë së re dhe konstituimit të Kuvendit Kurti tha se do të ndodhë “shpejt”, sepse “siç e dini i kemi tri marrëveshje ndërkombëtare me Bankën Botërore, dhe njëkohësisht e kemi edhe planin e rritjes me Bashkimin Evropian, që është 882 milionë e 600 mijë euro”.
Ai përmendi edhe votimin e buxhetit si urgjencë.
“Ju e dini se me 1/12-tën qeveria në detyrë mund të vazhdojë veç edhe për muajin shkurt, për muajin mars nuk mund të vazhdojë kësi soji, andaj në muajin shkurt duhet ta kemi të përmbyllur edhe çështjen e buxhetit për vitin 2026”.
Kur u pyet për presidenten, Kurti sërish u përgjigj mjegullt e pa qartësi.
“Një herë këto tri hapa do t’i përmbyllim pastaj edhe te hapi i katërt do të ecim mbarë e mirë”.
