Kryeministri në detyrë i Kosovës, njëherit Kryetari i Lëvizjes Vetëvendosje, Albin Kurti, nuk është përgjigjur nëse do ta dërgojnë emrin e mandatarit te Presidentja Vjosa Osmani, pasi që nga kjo parti e kanë shpallur të përfunduar procesin e konstituimit të Kuvendit, ndonëse nënkryetari nga radhët e komunitetit jo shumicë serb nuk është zgjedhur.
“Ato janë gjëra të Prishtinës. Atje i diskutojmë ato. Këtu jemi, investimi 11 milionë euro në stadium të futbollit në Suharekë”, tha Kurti për gazetarë pasi mori pjesë në fillimin e punimeve për ndërtimin e stadiumit të ri në Suharekë.
Kryetari i Kuvendit të Kosovës, Dimal Basha, në seancën e së shtunës ka thënë konstituimi i Kuvendit konsiderohet i mbyllur edhe pse një nënkryetar nuk është zgjedhur.
Nga ana tjetër, opozita dhe njohës të çështjeve kushtetuese kanë thënë se pa zgjedhjen e të gjithë nënkryetarëve nuk mund të konsiderohet i konstituuar Kuvendi. Ndërsa, Presidentja Osmani ka thënë se ekipi ligjor i saj është duke analizuar këtë proces.
