Pierre Richard Propser, avokati i ish-Presidentit të Kosovës, Hashim Thaçi, ka thënë se tash e tutje në Gjykatën Speciale, ku po gjykohen ish-krerët e UÇK-së, do të dëgjohen prova që tregojnë se Thaçi nuk është përgjegjës për akuzat që i janë bërë.
Këto komente, Propser i ka bërë në një prononcim për media duke hyrë në seancën gjyqësore, ku do të dëshmojë ish-diplomati amerikan që gjatë kohës së luftës së fundit në Kosovë ka qenë Ndihmëssekretar Amerikan i Shtetit, James Rubin, si dëshmitar i parë i mbrojtjes.
“Jemi entuziast për sot, që do të na jep një shans që të kthehemi në realitet, do të kemi një shans që të tregojmë të vërtetën se çfarë me të vërtetë ka ndodhur në Kosovë në vitin 1999. Do të jetë fillimi i ri ku ju mund të shihni prova të reja që do të tregohen që presidenti nuk është përgjegjës për akuzat që i janë bërë”, deklaroi ai.
Avokati i Thaçit shtoi se ish-presidenti i falënderon të gjithë që po e përkrahin në këtë proces.
