Nick Cave ka rrëfyer përjetimin e të parit live të Radiohead në Londër, duke e krahasuar koncertin me një “aktivitet shpirtëror”.
Në një bashkëbisedim me fansat e tij, në blogun e tij The Red Hand Files, Cave tha se i pëlqente të shkonte në koncertet e artistëve të tjerë, ndërsa pohoi se koncerti i Radiohead ishte i pari në një arenë të madhe që ai kishte parë ndonjëherë.
“Gjatë dy muajve të fundit kam ndjekur shumë koncerte, mbrëmje të jashtëzakonshme, të gjitha, përfshirë Bob Dylan, Swans, Radiohead, Cameron Winter dhe Dirty Three”.
“Në koncertin e Radiohead në O2, isha ulur mes njëzet mijë njerëzve. Çuditërisht, ishte hera e parë që ndodhesha ndonjëherë në publik në një shfaqje kaq të madhe, dhe u mahnita nga thellësia e dashurisë në sallë – njerëz që kërcenin, bërtisnin, qanin, përqafoheshin. U godita nga kuptimi se sa e fuqishme është muzika live – që një grup individësh mund të bashkohen dhe të krijojnë një tingull unik për ta, dhe që njerëzit mund të lidhen me atë vizion të veçantë sikur të ishte përvoja e tyre personale. Mund ta ndjeja cilësinë e saj morale – se si kjo forcë e veçantë ka aftësinë ta riparojë botën me mirësinë e saj”.
“Unë angazhohem në aktivitete të ndryshme shpirtërore – notoj në një liqen, shkoj në kishë, ec në natyrë, meditoj – por asnjëra nuk ofron mundësinë transhendente të një koncerti live. Është një formë e veprimtarisë njerëzore që rrezaton mirësi, duke u përhapur nëpër turmë dhe në botë si një forcë riparuese, kozmike, që përmirëson gjërat dhe e mban djallin larg. Besoj se publiku i Radiohead po reagonte jo vetëm ndaj muzikës, e cila ishte mahnitëse, por edhe ndaj guximit të interpretuesve – nervit të pastër për të qëndruar përpara një turme dhe për të ofruar shpirtrat e tyre. Ashtu si të gjithë të tjerët aty, u preka thellë dhe u përula”, ka deklaruar Nick Cave.
Cave e përshkroi Radiohead si një bend që po angazhohet në një akt të jashtëzakonshëm guximi të zakonshëm, një formë thellësisht njerëzore heroizmi – paturpësia për të qëndruar përpara botës dhe për të deklaruar: “Kjo është ajo që mendojmë. Kjo është ajo që ndiejmë. Këta jemi ne”.
Radiohead përmbyllën këtë javë në Kopenhagë turneun e tyre të parë në Mbretërinë e Bashkuar dhe Europë pas shtatë vjetësh, me vokalistin Thom Yorke që dukej veçanërisht emocional ndërsa u dha lamtumirën fansave.
