Ambasadori i Mbretërisë së Bashkuar, Jonathan Hargreaves, ka shprehur shqetësimin e tij në lidhje me ngërçin politik në Kosovë dhe sulmet që po drejtohen ndaj Gjykatës Kushtetuese nga akterë të pushtetit.
Në një intervistë për Radio Evropa e Lirë, shefi i diplomacisë britanike në Kosovë ka theksuar edhe nevojën për zotim gjithë-partiak në respektim të vendimeve të Gjykatës Kushtetuese.
“Sa i përket Gjykatës Kushtetuese, po, të gjithë po presim me padurim vendimin javën e ardhshme, dhe shpresoj që Gjykata të jetë në gjendje ta japë në kohë. Natyrisht, nuk e di se çfarë do të jetë, dhe nuk mendoj se ndonjëri prej nesh e di me siguri. Mendoj se më e rëndësishmja është që të gjitha palët e përfshira ta marrin shumë seriozisht, të deklarojnë publikisht se do të zbatojnë çdo gjë që sugjeron ose urdhëron Gjykata dhe, mbi të gjitha, të veprojnë për ta zbatuar”, ka thënë ambasadori Hargreaves.
Diplomati britanik nuk ka lënë pa komentuar edhe pasojat e këtij ngërçi politik.
Sipas Hargreaves, Kosova duhet ta përfundojë krijimin e institucioneve në mënyrë urgjente.
“Mendoj se Kosova po humb gjatë kësaj periudhe, duke mos pasur një zë të plotë dhe të besueshëm ndërkombëtar. Mësa kuptoj, pothuajse një miliard euro grante dhe hua janë të bllokuara në Kuvend. Janë, gjithashtu, shumë ligje që duhet të kalojnë. Pra, populli i Kosovës po humb nga mungesa e një kuvendi dhe qeverie të plotë”, ka deklaruar diplomati britanik.
