Lista Serbe ka paralajmëruar se do të dërgojnë lëndë në Gjykatën Kushtetuese për çështjen e zgjedhjes së nënkryetarit të Kuvendit nga komuniteti jo shumicë serb.
“Dua t’ju paralajmëroj se Lista Serbe do të çojë ankesë në Gjykatë Kushtetuese sepse rregullat janë shkelur”, tha deputeti i kësaj partie, Igor Simiç, në një konferencë për media nga holli i Kuvendit.
Simiç u bëri thirrje deputetëve të partive shqiptare dhe pakicave tjera joshumicë “që të mos votojnë për vendime jokushtetuese”.
“Krejt kjo do të mbetet e shënuar se çfarë kanë bërë që Nenad Rashiç-in me çdo çmim siç e kanë shtyrë në parlament pa votat e serbëve”, shtoi ai ndër të tjera.
Konstituimi i Kuvendit ka ngecur te zgjedhja e nënkryetarit nga radhët e komunitetit serb. Lista Serbe në senacën e së martës propozoi tri herë Slavko Simiç-in, i cili nuk i mori votat e mjaftueshme.
Pas tri tentativash të dështuara, Kryetari i Kuvendit, Dimal Basha, i kërkoi që ta ndërrojnë kandidatin, pasi që, sipas tij, aktgjykimi i fundit i Gjykatës Kushtetuese, nuk e lejon që një kandidat të kandidohet më shumë se tri herë.
Lista Serbe e kundërshtoi këtë dhe refuzoi që të propozoi kandidat tjetër. Pas kësaj, Basha aplikoi procedurat e përzgjedhjes me short, ku u provuan një numër i konsiderueshëm i deputetëve të Listës Serbe, por që të gjithë dështuan.
Dy herë u kandidua edhe deputeti Nenad Rashiç, që nuk është pjesë e Listës Serbe. Por, edhe ai nuk u mori votat e mjaftueshme, përkundër se Lëvizja Vetëvendosje votoi pro tij.
