Ish-kryeministri i Kosovës, Isa Mustafa, dhe nënkryetari i LDK-së, Lutfi Haziri, kanë shprehur publikisht përkrahjen për protestën e 7 gushtit, të thirrur nga organizatat e dala nga lufta kundër Gjykatës Speciale, e cila po i gjykon krerët e UÇK-së.
Në një reagim në Facebook, Mustafa thekson se “është detyrë e të gjithëve të mbrojnë vlerat e luftës” dhe të mos lejohet që “historia të rishkruhet mbi bazën e dëshmive të instrumenteve të pushtetit serb”.
“Sikur ta kisha shëndetin, me 7 gusht do të isha edhe unë në Shesh”, shkroi ai.
Në të njëjtën linjë, nënkryetari i LDK-së, Lutfi Haziri, deklaron se protesta e 7 gushtit “është thirrja jonë për Republikën”.
“Duhet të mbrohen vlerat dhe qëllimi i përbashkët”, theksoi Haziri në një postim në Facebook.
Protestën e veteranëve kundër Gjykatës Speciale e kanë mbështetur edhe akterë të tjerë politikë në vend. Ndër ta, kryetari i PDK-së, Memli Krasniqi, ai i AAK-së, Ramush Haradinaj, e kreu i Nismës, Fatmir Limaj.
Që nga 5 nëntori i 2020-së, në qendrën e paraburgimit në Hagë ndodhen katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të akuzuar nga Dhomat e Specializuara për krime të pretenduara lufte dhe kundër njerëzimit.
