Ministri i Punëve të Jashtme të Izraelit, Gideon Sa’ar, është takuar në Jerusalem me Presidenten e Republikës Srpska – etniteti serb në Bosnje e Hercegovinë – Ana Trisiç-Babiç, dhe ish-presidentin e RS-së, Millorad Dodik, me të cilët tha se ka diskutuar “kërcënimin e përbashkët të islamizmit radikal në rajonet tona”.
Përmes një postimi në platformën X, Sa’ar takimin me ish-presidentin autoritar të RS-së e quajti “të shkëlqyer”.
“I falënderova për miqësinë dhe mbështetjen e tyre. E vlerësojmë promovimin e tyre të kujtesës së Holokaustit, në dritën e rritjes së antisemitizmit në Evropë dhe Bosnje e Hercegovinë”, shtoi ai.
Serbët, potencoi kryediplomati izraelit, “janë miq të vërtetë të popullit hebre dhe të Shtetit të Izraelit!”.
Republika Srpska, entiteti serb në Bosnje e Hercegovinë, vazhdimisht ka ndërmarrë veprime që e minojnë sovranitetin e BeH-së.
Madje, shumë herë, ky etnitet, posaçërisht gjatë kohës kur Dodik ishte President, kanë kërcënuar me shkëputjen e RS-së nga BeH, por edhe kanë shpërfillur vendimet e Përfaqësuesit të Lartë në BeH.
Nga ana tjetër, Izraeli për dy vjet sulmoi ushtarakisht Rripën e Gazës, ku ka vrarë rreth 70 mijë civilë. Aksioni ushtarak i Izraelit në Gaza erdhi pas sulmit të 7 tetorit 2023 të Hamasit në Izrael, i cili la të vrarë qindra njerëz.
