Ka përfunduar ndërtimi i njërës prej urave mbi lumin Ibër – që lidh Mitrovicën e Jugut me atë të Veriut. Kjo urë është lëshuar tashmë për qarkullimin e automjeteve.
Lajmi për lëshimin e qarkullimit të urës së re mbi Ibër është bërë publik nga Ministri i Punëve të Brendshme, Xhelal Sveçla, dhe zëvendësministri i Infrastrukturës, Hysen Durmishi, i cili ka publikuar edhe një video duke lëvizur me veturë në urë.
“Të dashur qytetarë të Mitrovicës dhe gjithë Kosovës, urime ura e re!”, ka shkruar Sveçla
Ani pse u lëshua për qarkullim, sot nuk pati asnjë ceremoni të prerjes së shiritit – përkundër pompozitetit në ndërtimin e saj.
Ndërtimi i dy urave të reja mbi lumin Ibër kishte filluar në fillim të korrikut. Në vendosjen e gurthemelit kishte marrë pjesë edhe kryeministri në detyrë, Albin Kurti.
