Prokuroria Speciale ka nisur shqyrtimin e materialit të audio-incizimit të cilin e ka publikuar VOX Kosova dhe ka autorizuar policinë që ta sigurojë materialin dhe t’i marrë në pyetje të gjithë personat e përfshirë në këtë rast.
Këtë e ka konfirmuar për VOX-in një burim brenda Prokurorisë Speciale të enjten.
Në audio-incizim dëgjohet Kryetari i Drenasit, Ramiz Lladrovci, duke biseduar me biznesmenin, Labinot Halilaj, për ndërtime banesash në një prone komunale.
Aty, Lladrovci flet për përfitimet milionëshe në rast se Halilaj do të merrte këtë projekt. Madje, i premton edhe lejim të mbindërtimit.
Kryetari i Drenasit e ka pranuar vërtetësinë audio-incizimit, por pretendon se nuk është i plotë dhe i njëjti është i cunguar e i deformuar.
VOX Kosova i ka kërkuar Lladrovcit që ta sjellë versionin e plotë për ta publikuar, por ka refuzuar.
Biseda e Lladrovcit me Halilajn dhe me disa asamblistë të PDK-së në Drenas, besohet të jetë bërë mes muajve shtator-nëntor të vitit 2024.
