Kryeministri në detyrë, Albin Kurti, ka përsëritur se Lëvizja Vetëvendosje synon që presidenti i ardhshëm i Kosovës të jetë një figurë konsensuale, me mbështetje sa më të gjerë politike dhe qytetare.

Kurti ka thënë se marrëveshja për presidentin duhet të arrihet paraprakisht me partitë e tjera, në mënyrë që të shmangen zgjedhjet e reja. Sipas tij, zgjedhja e presidentit mbetet sfida kryesore, ndërsa përbërja e institucioneve të tjera mund të zgjidhet më lehtë.

Ai ka deklaruar se Vetëvendosje është e gatshme të diskutojë me partitë politike për të gjetur një kandidat që është jashtë polemikave të përditshme partiake dhe që mund të shërbejë si figurë unifikuese.

Kurti ka folur edhe për ofertën ndaj LDK-së, duke thënë se Vetëvendosje i ka propozuar kësaj partie pozitën e kryetarit të Kuvendit, ndërsa në rast të një presidenti konsensual, LDK-së i është ofruar posti i zëvendëskryeministrit dhe tri ministri.

Nëse kandidati për president do të ishte Glauk Konjufca, Kurti ka thënë se oferta për LDK-në do të përfshinte zëvendëskryeministrin dhe katër ministri.

Kurti ka kritikuar vendimin e LDK-së për të qëndruar në opozitë, duke vlerësuar se kjo parti do të duhej të bëhej pjesë e bashkëqeverisjes.

Në fund, ai ka përshëndetur thirrjen e kryetarit të LDK-së, Lumir Abdixhiku, që në diskutimet për presidentin të përfshihen edhe partitë e tjera politike, duke theksuar se synimi është një president sa më gjithëpërfshirës.