Asnjë fjalë nuk e ka thënë para gazetarëve zëvendëskryeministri në detyrë, Besnik Bislimi, i cili dëshmoi sot në Prokurorinë Speciale në cilësinë e dëshmitarit lidhur me rastin e dhënies me qera të fabrikës për përpunimin e nënprodukteve shtazore nga Ministria e Bujqësisë.
Pas intervistimit, përmes një reagimi në rrjetin e tij social “Facebook,” i dyti i Qeverisë ka akuzuar Prokurorinë për “luftë politike”.
“Intervista zgjati diku 1 orë e 30 minuta dhe përgjatë kësaj kohe nuk kishte asnjë pyetje që mund të cilësohet si pyetje drejtuar një dëshmitari”, ka shkruar Bislimi.
Ai ka shtuar se Prokuroria duhet ta rishikojë qasjen e saj, teksa ka theksuar se “përfundimi se qëllimi parësor i kësaj interviste ka qenë prodhimi i lajmit medial, ku eksponentë të qeverisë bëhen pjesë e titujve bashkë me termin ‘skandal’.
Pos Bislimit, për këtë rast muajin e kaluar është intervistuar nga organi i akuzës edhe ministri në detyrë i Bujqësisë, Faton Peci dhe kryeshefi i Agjencisë së Ushqimit dhe Veterinës, Bekim Hoxha.
Gjatë muajit maj, dikasteri i drejtuar nga Peci është bastisur nga hetuesit policorë pas raportimit të gazetarit Lirim Mehemtaj për “dallaveret” për dhënien me qera të fabrikës për mbetje shtazore.
