Kryeministri i Shqipërisë, Edi Rama, ka shprehur mbështetjen e tij për protestën kundër Gjykatës Speciale, që po mbahet në Hagë të Holandës.
“Liria ka emër. Me zemër e mendje jam edhe unë atje sot Komandant. Liri për çlirimtarët”, shkroi Rama në Facebook, ku ndau edhe një video.
Mijëra qytetarë shqiptarë nga vende të ndryshme që nga orët e para të mëngjesit kanë mbërritur në Hagë të Holandës për të protestuar kundër Gjykatës Speciale.
Protesta është thirrur nga mërgata shqiptare dhe është mbështetur nga Organizata e veteranëve të dalur nga Lufta e Ushtrisë Çlirimtare të Kosovës (OVL-UÇK), për, siç thonë ata, padrejtësitë që po bëhen në procesin e gjykimit ndaj ish-krerëve të UÇK-së.
Kjo po mbahet pas asaj që u organizua në Prishtinë më 7 gusht. Dhjetëra mijëra qytetarë nga të gjitha trojet shqiptare u mblodhën në Prishtinë për të kundërshtuar Gjykatën Speciale, e në mbrojtje të ish-krerëve të UÇK-së.
Që nga 5 nëntori i 2020-së, në qendrën e paraburgimit në Hagë ndodhen katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të akuzuar nga Dhomat e Specializuara për krime të pretenduara lufte dhe kundër njerëzimit.
