Një pauzë në konfliktin e Ukrainës mund të jetë afër, ka thënë kryeministri polak Donald Tusk të premtën pasi foli me presidentin ukrainas Volodymyr Zelensky.
Presidenti rus, Vladimir Putin, dhe ai amerikan, Donald Trump do të takohen në ditët në vijim, ka njoftuar Kremlini të enjten, teksa presidenti amerikan po kërkon një përparim drejt fundit të luftës në Ukrainë—që tani po hyn në vitin e katërt.
“Ka disa sinjale, dhe ne kemi gjithashtu një lloj intuite, që ndoshta një ngrirje e konfliktit – unë nuk dua të them një përfundim, por një ngrirje e konfliktit—është më afër sesa larg”, ka thënë Tusk. “Ka shpresë për një gjë të tillë”.
Tusk tha se Zelensky ishte “shumë i kujdesshëm, por optimist” dhe se Ukraina është mirënjohëse që Polonia dhe vendet e tjera evropiane luajnë rolin e tyre në planifikimin e një armëpushimi dhe një pajtimi eventual për paqe.
