Presidenti i Shqipërisë, Bajram Begaj, ka thënë se mbështetja për anëtarësimin e Kosovës në Organizatën e Kombeve të Bashkuara (OKB), është akt drejtësie ndaj popullit të Kosovës.
Këto komente, Begaj i ka bërë në fjalën e tij në Asamblenë e Përgjithshme të OKB-së, ku ka folur për Shqipërinë, Kosovën, por edhe për shqiptarët e Luginës së Preshevës.
“Vendi i Kosovës në këtë Asamble mbetet padrejtësisht bosh. Njohja e pavarësisë së Kosovës, mbështetja për anëtarësimin e saj në Kombet e Bashkuara dhe në organizatat e tjera ndërkombëtare është një akt drejtësie ndaj popullit të Kosovës, është një hap që forcon edhe më shumë paqen dhe sigurinë në Ballkanin Perëndimor dhe një kontribut në stabilitetin e Evropës”, tha Begaj.
Presidenti ka kërkuar edhe që të drejtat e shqiptarëve në Luginë të Preshevës të respektohen, që ata të mos diskriminohen, që “gjuha shqipe të përdoret, kultura, vlerat, identiteti dhe traditat e tyre te mbrohen dhe promovohen”.
