Albin Kurti, kryeministër në detyrë i Kosovës, gjatë kohës sa ishte në opozitë, u thoshte qytetarëve se ish-qeveritarët do t’i dërgojë në burg.
“Aq shumë të këqija kanë bërë, saqë këta nuk besojnë se me ra prej pushtetit nuk përfundojnë në burg po mbesin në shtëpi. Nuk besojnë. Kjo është arsyeja se pse me cdo kusht donë të mbesin në pushtet. Pushteti për ta do të thotë liri”, thoshte Kurti në një nga protestat e Vetëvendosjes.
E vetmja arsye se pse nuk janë në burg është për fatin se janë në pushtet, thoshte Kurti.
“Këta vetëm në pushtet janë jashtë burgut, vetëm brenda pushtetit janë jashtë burgut. Edhe Zoti me zbrit në tokë, me iu thanë këtyre që mos t’ua ninë se kur te humbni pushtetin shkoni te shtëpia nuk shkoni në burg, këta nuk besojnë”, thoshte ai.
Por, kur kanë kaluar 5 vjet të Kurtit në pushtet, akoma asnjë politikanë s’ka përfunduar në burg. Madje, asnjë nuk është dënuar.
