Ka mbetur vetëm edhe një ditë nga përfundimi i masës së përkohshme të vendosur nga Gjykata Kushtetuese e Kosovës për bllokimin e të gjitha veprimeve të të zgjedhurve të popullit në Kuvend.
Masa, zyrtarizuar më 5 shtator, u mor pas kërkesës për vlerësimin e kushtetutshmërisë së procesit të votimit të nënkryetarëve të komuniteteve jo-shumicë.
Ishte Lista Serbe, grupi politik që u ankua për përmbylljen e konstituuimit të Kuvendit edhe përkundër mos-zgjedhjes së nënkryetarit nga radhët e komunitetit serb.
Sipas kushtetueses, institucionet shtetërore të vendit duhet të zgjedhën të paktën 30 ditë pas certifikimit të rezultateve të zgjedhjeve. Megjithatë, ky afat është shtyrë e tej-shtyrë duke marrë në konsideratë faktin që zgjedhjet parlamentare janë mbajtur në shkurt të këtij viti.
Gjykata nuk ka dhënë ndonjë detaj se çfarë do të ndodhë pas përfundimit të masës së vendosur dhe kjo ngre pikëpyetjen nëse procedurat kuvendare duhet të fillojnë nga nesër apo nëse do të ketë ndonjë vendim që do të ndryshojë rrjedhën e ngjarjeve.
