Kryetari i Aleancës për Ardhmërinë e Kosovës, Ramush Haradinaj, ka thënë se vetëm Kryetari i Lidhjes Demokratike të Kosovës, Lumir Abdixhiku, dhe deputetët e kësaj partie po janë pozicionuar “pro bllokadës” së konstituimit të Kuvendit.
“Veç Lumir Abdixhiku me të tijtë, janë betonuar pro kësaj bllokade. Lumiri ka vendnumëruar në vazhdimësi dhe po vazhdon të vendnumërojë ende. Vazhdo të vendnumërosh se kjo të shkon për shtati ty, Lumir!”, shkroi Haradinaj në Facebook.
Kreu i AAK-së tregoi edhe hapat që partia që ai udhëheqë ka ndërmarrë për të zhbllokuar situatën, pasi që këtë bllokadë thotë se e kishin vërejtur muaj më parë.
“Duke e parë këtë rrezik katastrofik për vendin, AAK e ka dërguar kërkesën për interpretim në Gjykatën Kushtetuese dhe ajo, me vendimin e saj të parë dhe të dytë, e ka vendosur modelin e daljes nga bllokada dhe ne jemi pozicionuar pro vendimit të Gjykatës”, shtoi.
LDK-ja nuk e votoi Dimal Bashën për Kryetar të Kuvendit. Nga kjo parti kishin deklaruar që nuk do ta votonin asnjë kandidat nga VV-ja. Pjesa dërrmuese e deputetëve të AAK-së dhe PDK-së e votuan Bashën, i cili mori 73 vota për, 30 kundër dhe 3 abstenime.
