Kanadaja, Britania e Madhe dhe Australia e kanë njohur zyrtarisht shtetin palestinez të dielën. Kjo lëvizje e përbashkët e tyre synon të ringjallë procesin e paqes në Lindje të Mesme, të bazuar në modelin e dy shteteve – Izrael dhe Palestinë – në një periudhë kur sulmet izraelite në Gaza janë intensifikuar.
“Kanadaja njeh Shtetin e Palestinës dhe ofron partneritetin tonë në ndërtimin e premtimit për një të ardhme paqësore si për shtetin e Palestinës ashtu edhe për shtetin e Izraelit”, shkroi kryeministri kanadez Mark Carney në platformën X.
Në të njëjtën ditë edhe Mbretëria e Bashkuar njoftoi për vendimin e saj.
“Sot, për të ringjallur shpresën për paqe për palestinezët dhe izraelitët, dhe për një zgjidhje me dy shtete, Mbretëria e Bashkuar njeh zyrtarisht Shtetin e Palestinës” shkroi kryeministri britanik, Keir Starmer në X.
Në të njëjtën linjë edhe Australia u bashkua me Kanadanë dhe Britaninë në njohjen e shtetit palestinez.
“Duke bërë këtë, Australia njeh aspiratat legjitime dhe të kahershme të popullit të Palestinës për një shtet të tyre”, ka thënë kryeministri australian, Anthony Albanese.
Ai theksoi se kjo është pjesë e një përpjekjeje të përbashkët së bashku me Kanadanë dhe Britaninë dhe se do të formojë “një përpjekje ndërkombëtare për një zgjidhje mes dy shteteve”.
Ky vendim i përbashkët i tre shteteve është kundërshtuar nga Izraeli dhe Shtetet e Bashkuara të Amerikës (SHBA).
