Dorëheqja e Liburn Aliut nga pozita e Ministrit të Mjedisit, Planifikimit Hapësinor dhe Infrastrukturës, e dhënë të mërkurën, shënon fundin e një kapitulli politik, por jo edhe të angazhimit të tij në raport me këtë dikaster. Arsyeja është se emri i tij është i ndërlidhur me disa afera korruptive, të cilat edhe janë subjekt i hetimit nga Prokuroria Speciale.

Aliu, i cili për katër vite drejtoi një nga ministritë më të mëdha të vendit, përballet me akuza për keqpërdorim të detyrës. Hetimet përfshijnë disa çështje të rëndësishme, si rasti i kompanive të ambalazhuesve të ujit, ku dyshohet se ministria ua fali kundërligjshëm miliona euro borxhe këtyre kompanive.

Për këtë rast, në vitin 2024, ishin arrestuar dy zyrtarë të kësaj ministrie: Naser Hafizi dhe Izedin Bytyqi. Në të njëjtin vit, hetimet kishin nisur edhe ndaj Aliut.

Prokuroria Speciale është duke hetuar edhe 2 mijë kontrata njëburimore të Qeverisë së drejtuar nga Albin Kurti, një pjesë e të cilave janë të Ministrisë që deri tani është drejtuar nga Aliu.

Liburn Aliu dha dorëheqje të mërkurën nga pozita e Ministrit të MMPHI-së, pas zgjedhjes së Kryetarit të Kuvendit, Dimal Basha. Ai është njëri prej themeluesve të Lëvizjes Vetëvendosje dhe ka qenë aktiv që nga ditët e para të kësaj partie.