Slavko Simiç, deputet nga radhët e Listës Serbe, nuk është votuar për Nënkryetar të Kuvendit të Kosovës nga radhët e komunitetit serb në tri tentativa.
Herën e parë votuan 10 deputetë për, 55 kundër dhe 23 abstenuan. Herën e dytë 10 për, 56 kundër dhe 21 abstenime – identik ishte edhe në të tretën.
Pas tri dështimesh, Kryetari i Kuvendit, Dimal Basha, i ka kërkuar Listës Serbe që ta ndryshojë kandidatin, duke u thirrur në aktgjykimin e fundit të Gjykatës Kushtetueses, ku thuhet se i njëjti kandidat për kryetar Kuvendi mund të propozohet vetëm tri herë.
Por, Igor Simiç nga Lista Serbe ka thënë se aktgjykimi i Kushteueses nuk është për nënkryetarin, por vetëm për Kryetarin dhe e propozoi sërish Slavko Simiçin, që nuk u pranua nga Basha.
Votimi për nënkryetarët e Kuvendit nga radhët e komuniteteve joshumicë është bërë ndaras, kjo pasi që Kryetari i Kuvendit, Dimal Basha, tha se nuk ka pajtueshmëri që të shkohet në votim të përbashkët, kërkesë që iu parashtrua nga deputeti Elbert Krasniqi.
Nga komunitetet joshumicë joserbe propozuan tre emra me rrotacion për pozitën e nënkryetarit. Si nënkryetare fillimisht u propozua Emilja Rexhepi, ndërsa pas saj do të jetë Fidan Jilltan dhe Artan Asllani.
Rexhepi u zgjodh nënkryetare me 73 vota për, 1 kundër dhe 23 abstenime.
