Gjykata Themelore në Gjilan, ka caktuar masën e paraburgimit prej 30 ditësh ndaj Rinas Zeqirit, kandidat i Lëvizjes Vetëvendosje për Asamblenë Komunale të Novobërdës dhe dy të tjerëve.
Ata dyshohet se kanë kultivuar bimën e hashashit, shkurres së kokainës ose bimëve të kanabisit.
“Zyrtarët policor në Gjilan marrin informacion se në këtë fshat mund të ketë të mbjella bimë narkotike të llojit ‘Kanabis Sativa’ shkojnë tek shtëpia e të pandehurit A. S., me ç’rast me rastin e kontrollit në oborrin e shtëpisë, në brendësi të serave të ndërtuara, gjejnë të kultivuara 496 bimë të këtij lloji, me gjatësi 2 metra”, thuhet në komunikatë.
Policia pati bërë të ditur në njoftimin e saj se gjatë bastisjes ishin gjetur dhe sekuestruar: një armë e gjatë AK-47, një karikator me 19 fishekë kalibër 7.62×39 mm, pesë telefona, si dhe një veturë Golf V.
