Dimal Basha përjetoi dje ngjitjen më të madhe në karrierën e tij politike.
Pas një bllokade disa mujore, ai u zgjodh Kryetar i Kuvendit të Kosovës me 73 vota pro.
Për uljen e tij në karrigen e të parit të Kuvendit ndihmuan PDK dhe AAK me votat e tyre.
Megjithatë, zgjedhja e tij nuk u shoqërua me ndonjë ceremoni festive nga partia prej së cilës vjen.
Asnjë nga zyrtarët e lartë të saj, madje as lideri, nuk kanë shprehur publikisht urime për të.
Postimi i fundit i Albin Kurtit ka të bëjë me urën e re në Mitrovicë. Ai u pa i ftohtë gjatë ashtu edhe pas zgjedhjes së Bashës.
As kur Basha u drejtua për në karrigën e tij, e as pas fjalimit, Kurti nuk u ngrit t’ia zgjat dorën për urim, shkruan Vox Kosova.
Edhe kryetari i deritanishëm, Glauk Konjufca, nuk ka bërë ndonjë urim publik për pasardhësin e tij.
Albulena Haxhiu, një ndër pretendentet kryesore për këtë pozitë, nuk ka publikuar asnjë mesazh urimi.
Në vend të kësaj, ajo është fokusuar te ngërçi i ri në Kuvend, që ka të bëjë me zgjedhjen e nënkryetarit nga komuniteti serb.
Haxhiu është votuar si e dyta pas Bashës, së bashku me Vlora Çitakun nga PDK dhe Kujtim Shalën nga LDK.
As Donika Gërvalla, partnere e koalicionit dhe njëherësh ish-kandidate për kryetare të Kuvendit, nuk ka shprehur publikisht urim për Bashën.
I vetmi që ka reaguar është Hekuran Murati, i cili ka shpërndarë fjalimin e Bashës me mbishkrimin: “Urime detyrën e re, Dimal Basha!”
Bashës nuk i kanë munguar përgëzimet nga Shqipëria.
Presidenti i Republikës së Shqipërisë, Bajram Begaj, kryetarja e Kuvendit, Elisa Spiropali, dhe kryetari i Partisë Demokratike, Sali Berisha, janë ndër figurat e vetme politike që kanë uruar zgjedhjen e tij në krye të institucionit legjislativ të Kosovës./VOX
