Kolapsi energjetik në vend ka rikthyer sërish zhurmën e gjeneratorëve. Mungesa e prodhimit dhe një konsum i lartë kanë bërë që të ketë vështirësi në furnizim dhe kjo gjendje ka hapur rrugë për import të madh të rrymës.
Kompania Kosovare për Furnizim me Energji Elektrike (KESCO) ka bërë me dije se është detyruar të sigurojë rreth 50% të energjisë elektrike përmes importit.
Sipas saj, kjo është bërë përmes kontratave bilaterale, por edhe përmes tregtimit me oferta brenda-ditore.
KESCO ka folur për vështirësi në sigurimin e energjisë, siç ka thënë, për shkak të problemeve në kufirin me Serbinë dhe kapaciteteve të kufizuara në kufijtë me Malin e Zi dhe Maqedoninë e Veriut.
Edhe ALPEX, bursa e përbashkët energjetike e Kosovës dhe Shqipërisë, nuk ka ofruar furnizim të mjaftueshëm.
Gjatë vitit 2025, ka pasur raportime për import të lartë të energjisë me vlera qindra milionëshe. Sipas Agjencisë së Statistikave të Kosovës, vetëm gjatë muajit nëntor të vitit të kaluar, Kosova ka importuar 325 mijë megavat-orë.
Në këtë tregtim të rrymës së Kosovës, përfitues i milionave kishte qenë edhe biznesmeni serb Vuk Hamoviç përmes kompanisë së tij të tregtimit të energjisë, Energy Financing Team (EFT).
Kjo kompani ishte licencuar për tregtim dhe furnizim me energji në Kosovë në vitin 2021 nga Zyra e Rregullatorit të Energjisë.
Përveç problemeve me furnizimin me energji, qytetarët e Kosovës janë përballur gjatë këtyre pesë viteve edhe me shtrenjtimin e faturave.
Një shtrenjtim i radhës i rrymës është paralajmëruar të ndodhë edhe në pranverën e këtij viti.
