Kur Valon Prebreza ia kishte mësyrë garës për kryetar komunën e Fushë Kosovës, partia e tij, Vetëvendosje, kishte një plan të qartë se si do t’ia siguronte votat. Në qershorin e vitit 2023, ai u emërua Shef i Njësisë për Monitorimin e Ndërmarrjeve Publike.
Kjo lëvizje, i siguronte atij duar të hekurta mbi të gjitha Ndërmarrjet Publike në Kosovë, de fakto, sepse de jure, pozicioni i tij është krejtësisht raportues e mbledhës statistikash.
Por aq i bënte Prebrezës e Vetëvendosjes. Mbi bazën e pozicionit që ia dhuroi partia, Prebreza nisi fushatën e egër në Korporatën Energjetike të Kosovës. Pas presionit të ushtruar, nën prezencën e tij Bordi mori vendim që ta themelonte Departamentin e Sigurisë Fizike në KEK.
Kësisoj do të hapeshin konkurse, përmes së cilave supozohej që punëtorët e vjetër që siguronin KEK-un përmes kompanive private me tenderë, tash do të ishin direkt në menaxhimin e ndërmarrjes. Dhe këtu ishte mundësia ideale për Prebrezën. Të punësonte militantë pa zgjedhur metodë, në një anarki totale duke përjashtu edhe punëtorët shumëvjeçarë.
Për ta realizuar qëllimin e tij, Prebreza në krye të komisionit për pranimin e punëtorëve vendosi Ali Berishën, personin që në këtë fotografi shfaqet në një tubim elektoral me të, në krye të vendit.
Personat tjerë të pranishëm, që Prebreza i paraqet si simpatizantë, në realitet janë punëtorë që përmes tij u pranuan në Konkursin për Siguri Fizike në KEK. Qe për shembull, Driton Zogjani, Fidan Mjeku, Skënder Fazliu, Fehmi Berisha, Menderes Berisha e Xhevat Goxhuli.
Si këta që i përmenda janë shumë, që përmes Prebrezës u pranuan në konkursin e Sigurisë Fizike. Disa hynë pa asnjë ditë përvojë, të tjerë punëtorë ekzistues të afërt me Prebrezën, nuk u prekën.
Të punësuar me lidhje përmes Prebrezës janë rreth 70. E pati të tillë, që kumbarën e punësimeve e falënderuan edhe publikisht.
Listën e plotë, VOX Kosova e ka siguruar përmes burimeve të veta. Sepse KEK-u, zyrtarisht, as nuk pati përgjigje, e as nuk na dha qasje në dokumente publike që i kërkuam.
E keqja e këtij krimi s’është veç kjo. Është edhe fakti që pushteti qendror e dinte çka po ndodhte, andaj më 31 korrik, një ditë para se punëtorët e ri të nisnin punën, ngarendën të lavdëroheshin për formimin e këtij departamenti në KEK.
Sipas informacioneve që ka VOX Kosova, palë individuale apo edhe grupore kanë dërgu dosje në organin e akuzës për këto zhvillime.
E prokuroria nuk ka pse të kërkojë gjatë.
Dosja është e shkruar vetë nga pushteti, mjafton të lexohet.
