Ministrja e Punëve të Jashtme në detyrë, Donika Gërvalla, e ka pranuar se deri në vitin 2018 ka pasur kontakt me Gjykatën Speciale, e cila akuzon ish-krerët e UÇK-së për krime të pretenduara lufte.
“Nuk ka që nga viti 2018, asnjë kontakt të vetëm, qoftë direkt, qoftë indirekt timin me Gjykatën Speciale…”, tha Gërvalla në një konferencë për media pas seancës konstituive të Kuvendit të Kosovës.
Në vitin 2016, në një paraqitje televizive në RTV Dukagjini, Gërvalla thoshte “se patjetër se do të dorëzonte dosje në Hagë”, dhe dyshimi i vetëm që paraqiste ishte se “s’e di nëse do të merren parasysh”.
Ndërsa, sot ka kërcënuar me padi “të gjithë ata që thonë se ajo ka dërguar dosje në Gjykatën Speciale”, duke kërkuar që të pyeten avokatët e krerëve të UÇK-së nëse ajo është dëshmitare apo ka dërguar dosje kundër të akuzuarve Gjykatën Speciale.
