Kryeministri i Shqipërisë, Edi Rama, tha se Kosova duhet të punët e veta, duke mos u ndalur tek qëndrimet e Serbisë.
Në konferencën “Shqipëria, Horizonti i Ri” të mbajtur në Vjenë, ku morën pjesë sipërmarrës nga mbi 25 vende të botës, Rama u pyet për Ballkanin e Hapur dhe për çështjet e pazgjidhura mes Kosovës e Serbisë.
Kryeministri shqiptar tha se është i trishtuar që nuk ka asnjë përparim në dialog, por nënvizoi se Kosova duhet të bëjë pjesën e saj.
“Kosova nuk duhet të mendojë Serbinë, nuk duhet të shohë Serbinë, nuk duhet t’ia dijë çfarë bën Serbia. Duhet të bëjë detyrat e veta dhe t’ia dorëzojë Bashkimit Evropian fletoren e plotë të punëve të shtëpisë. Ky proces nuk lidhet me pranimin e asaj që kërkon Serbia, por me përmbushjen e kushteve që kërkon BE-ja,” tha Rama.
“Është në interesin e Kosovës të ecë përpara, pa u kushtëzuar me reagimet e Serbisë. Nëse nuk e bën këtë, do të vazhdojë të izolojë veten gjithnjë e më shumë, dhe kjo është për të ardhur keq,” shtoi ai.
