“Sakrificë” ka kërkuar nga qytetarët Ministrja në detyrë e Ekonomisë, Artane Rizvanolli, pasi që ka thënë se Kosova do të kalojë periudhë sfiduese me energjinë elektrike gjatë dy viteve të ardhshme, derisa nuk ka treguar se a do të rriten faturat e rrymës për 21.4 për qind, ashtu siç kërkoi para disa ditësh KESCO.
Rizvanolli, në një prononcim për media gjatë ceremonisë së përurimit të investimeve në efiçiencë të energjisë në Shkollën e Mesme Ekonomike ‘Isa Boletini’ në Podujevë, ka deklaruar se importi i rrymës do të rritet ndjeshëm, për shkak se, siç thekson ajo, blloqet e KEK-ut do të ndalen për disa muaj për shkak të modernizimit të tyre.
“Së pari duhet theksuar se lajmi që është publikuar ka të bëjë me kërkesën e furnizuesit dhe operatoreve të tjerë, por nuk ka një vendim ende. Ndërsa, duhet pasur parasysh disa zhvillime që janë objektive në sektor të energjisë që do të mund të kenë pasoja në këtë aspekt. Në Korporatën Energjetike të Kosovës vitin e kaluar kanë filluar investime në modernizim dhe rehabilitim që nuk janë bërë për 40 vjet”, tha Rizvanolli.
“Kjo do të thotë që për këto vite, vjet, sivjet dhe vitin e ardhshëm ne do të kalojmë një periudhë sfiduese, sepse blloqet duhet të ndalen, është e domosdoshme të ndalen për një kohë për disa muaj, në mënyrë që investimet të realizohen. Kjo është një sakrificë që duhet të bëjmë ne, për ne dhe gjeneratat e ardhshme”, shtoi ajo.
Sipas saj, investimi në KEK ka qenë arsyeja pse në 2025-në, “është dashur të importojmë më shumë, pra, ka arsyeje objektive pse importi është rritur, pse importi pritet të jetë i lartë edhe gjatë këtij viti, mirëpo edhe gjatë vitit të ardhshëm”.
