Presidenti amerikan, Donald Trump, ka thënë se mund të vendosë tarifa ndaj vendeve që kundërshtojnë kontrollin e Washingtonit mbi Grenlandën, duke vazhduar të jetë i palëkundur në qëndrimin e tij për të marrë nën kontroll ishullin Arktik, shkruan Euronews.
Donald Trump deklaroi të premten se mund të ndëshkojë me tarifa vendet që nuk mbështesin kontrollin amerikan mbi Grenlandën, në një kohë kur një delegacion, i përbërë nga dy partitë e mëdha amerikane, i Kongresit vizitoi kryeqytetin danez, Kopenhagën, për të treguar unitet dhe për të zbutur tensionet.
Gjatë një aktiviteti në Shtëpinë e Bardhë, mbi shëndetësinë rurale, Trump kujtoi se si kishte kërcënuar aleatët evropianë me tarifa mbi produktet farmaceutike, duke shtuar se mund ta përdorë sërish këtë strategji për të arritur objektivin e tij në Grenlandë.
“Unë mund ta bëj këtë edhe për Grenlandën,” tha Trump. “Mund të vendos tarifa ndaj vendeve nëse nuk pajtohen për Grenlandën, sepse ne kemi nevojë për Grenlandën për sigurinë kombëtare. Pra, mund ta bëj këtë,” u shpreh ai.
Prej muajsh, presidenti amerikan ka këmbëngulur se Washingtoni duhet të kontrollojë Grenlandën, territorin autonom i aleates së NATO-s, Danimarkës. Më herët gjatë kësaj jave, Trump deklaroi se çdo skenar tjetër përveç atij me ishullin Arktik nën kontrollin e SHBA-së është “i papranueshëm”.
Komentet vijnë pas bisedimeve të dështuara më herët gjatë javës në Uashington mes zyrtarëve danezë, grenlandezë dhe amerikanë, të cilat synonin të gjenin mënyra për të adresuar shqetësimet e SHBA-së pa iu drejtuar kërcënimeve apo aneksimit.
Në këto bisedime morën pjesë ministrat e jashtëm të Danimarkës dhe Grenlandës, të cilët u takuan me nënpresidentin amerikan JD Vance dhe sekretarin e Shtetit Marco Rubio.
