Simbolet e shtetësisë dhe flamurin e Kosovës i ka cilësuar gjithmonë si provokim Serbia. Por, shfaqja e tyre dhe kërkesa për t’i prezantuar ato – po përbën provokim edhe për një person që nuk është zyrtar serb. Presidenten e Gjykatës Speciale, Ekaterina Trendafilova.
Kështu ka thënë ajo vetë, në një takim me ambasadorët e Bashkimit Europian, i mbajtur më 7 dhjetor të vitit 2020.
Në këtë takim, ajo pyetet për një seancë – ku avokati i Hashim Thaçit e shpreh habinë që në sallën e gjyqit s’ka as flamur, e as simbole të Kosovës.
“Unë e them Gjykatë e Kosovës, por nuk ka këtu asgjë të Kosovës, nuk ka asnjë emblemë të Kosovës. Nuk e di pse jo”.
Për këtë sekuencë, Trendafilovës i kërkohet një përgjigje nga ambasadori gjerman, e cila tregohet në këtë dokument që prezanton një përmbledhje të takimit.
“Pse flamuri dhe simbolet e Kosovës nuk shfaqen në Gjykatë, siç ka pyetur avokati i Thaçit?”.
Përgjigja pason krejtësisht skandaloze nga Trendafilova. Ajo deklaron se kjo pyetje më as nuk duhet të shtrohet, sepse përbën provokim.
Provokim?
“Avokati i Thaçit e testoi dhe e provokoi gjyqtarin, me qëllim krijimin e një debati politik në Kosovë që delegjitimon Dhomat e Specializuara”, thotë Trëndafilova.
Sikur të mos mjaftonte kjo përgjigje, në vazhdim të përgjigjes e rrit tonin e kërcënimit Trendafilova.
Ja çfarë thotë:
“Gjyqtari i Procedurës Paraprake ishte i sjellshëm dhe i respektueshëm kundrejt tij (avokatit), diçka që nuk do të ndodhë më në raste të tjera nëse ngritët (si çështje) prapë”.
Simbolet e Kosovës nuk janë quajtur provokim as në Spanjë e në Greqi – shtete që s’e njohin hiç Kosovën, ama qenkan provokim për Presidenten e një institucioni të Kosovës.
Çfarë kuptimi ka kjo? Çfarë drejtësie mund të jetë kjo kur gjykatat fshehin flamurin, i frikësohen simbolit identifikues të popullit, e vetë popullin e përmend vetëm kur i duhet të arsyetojë dënimet drakonike të ish-krerëve të Ushtrisë Çlirimtare të Kosovës?
