Prindon Sadriu, burri i Presidentes së Kosovës, Vjosa Osmani, raportimet e mediave për shkollimin e vajzave të tij në shkolla private tejet të shtrenjta, si dhe përdorimin e resurseve shtetërore për mbrojtjen e tyre, i ka quajtur “nxitje për dhunë ndaj fëmijëve të vegjël”.
Ai i ka përqeshur gazetarët, duke thënë se të njëjtit nuk janë kritikë, por, sipas tij, janë “cirk i urrejtjes”. Reagimet e gazetarëve: Lirim Mehmetaj, Berat Buzhala dhe Vehbi Kajtazi, i ka quajtur “fletërrufe”.
“Postimet e mbushura me shpifje dhe frikë nuk janë lajme e opinione — janë udhëzime dhe nxitje për dhune edhe ndaj fëmijëve të vegjël”, shkroi Sadriu në Facebook.
“Në të kaluarën jo shumë të largët”, ai pretendoi se “ato kanë prodhuar pasoja shumë të rënda ndaj viktimave të këtyre fletrrufeve”.
“Koha e dhunës politike, likuidimeve fizike dhe e justifikimit të dhunës që shpien në to ka kaluar. Kushdo që fërkon duart për një skenar të tillë i bën disfavorin më të madh kauzës tonë për shtet të lirë e demokratik”, shtoi tutje ai.
Ky reagim i tij vjen pas atij të Osmanit, ku i sulmoi brutalisht gazetarët, të cilët, sipas saj, po përndjekin dhe rrezikojnë vajzat e saj, pasi që kameramani i mediumit “Paparaci”, Jetmir Muji, u arrestua në momentin kur po xhironte për një raport rreth shkollimit të vajzave të Presidentes.
