Deputetja e Vetëvendosjes, Shqipe Mehmeti Selimi, ka sqaruar arsyet e mospjesëmarrjes së sotme të saj në votimin e Donika Gërvallës për kryeparlamentare. Në një postim në Facebook, ajo ka bashkëngjitur dy postimet e Gërvallës për bashkëshortin e saj, Rexhep Selimin, në të cilat kryediplomatja aktuale e quante atë “figurë të botës së krimit” dhe “person të dyshuar nga Haga”.
Të njëjtat, siç potencoi Mehmeti – Selimi, janë arsyet pse ajo nuk votoi si kolegët e saj nga Vetëvendosje, gjersa mohoi të ketë motive tjera partiake.
“Ajo ka të bëjë me një postim të datës 7 shkurt dhe 25 mars 2020, të cilin po e bashkëngjis në këtë shkrim. Këtë shpjegim po e bëjë për hir të transparencës dhe respektit ndaj opinionit, mediave dhe në veçanti, përkrahësve e votuesve të Lëvizjes Vetëvendosje”, shkroi mes tjerash Mehmeti Selimi.
Donika Gërvalla u votua e dyta, pas Albulena Haxhiut sot për kryetare të Kuvendit. Megjithatë, të dyjat dështuan në numra duke marrë nga 57 vota pro.
