Në mbledhjen e fundit të Këshillit të Mediave të Shkruara, institucionit ndoshta më kredibil në Ballkan për gazetari, që ka funksion pak a shumë si Gjykatë e Gazetarëve, është vendosur që Jeta Xharra dhe mediumi Kallxo.com kanë shpifur kur kanë raportuar në shkrimin “Reagim ndaj fushatës shpifëse për kontratën e vitit 2017 mes BIRN-it dhe RTK-së”.
Siç ka vendosur Këshilli, shkrimi shpifës i Kallxo ka “shkelur kapitujt II dhe IV të Kodit të Mediave të Shkruara të Kosovës”.
Shkelja e kapitullit 2 është shkelja më e rëndë që mund ta bëjë një medium, sepse konfirmohet që nuk është raportuar e vërteta. Pra, është shpifur. Dhe qysh në pikën e parë të këtij kapitulli thuhet qartësisht se: “Gjatë punës së tyre gazetarët dhe redaktorët duhet ta respektojnë të vërtetën faktike dhe të drejtën e publikut që ta dijë të vërtetën”.
Kallxo.com i Jeta Xharrës nuk i ka qëndruar kësaj pike themelore në të bërit gazetari.
Prandaj, në mënyrë unanime, të gjithë gazetarët kanë vendosur se artikulli “Reagim ndaj fushatës shpifëse për kontratën e vitit 2017 mes BIRN-it dhe RTK-së” është një artikull shpifës dhe i shkruar me të pavërteta.
Situata bëhet akoma më e rëndë kur dihet se ky artikull u shkrua kundrejt një gazetari, kundrejt një kolegu, pra kundër Arsim Halilit, drejtor i Radio Kosovës.
Në njoftimin e KMSHK-së thuhet: “KMSHK ka miratuar ankesën e Arsim Halilit kundër Kallxo.com për shkrimin me titull ‘Reagim ndaj fushatës shpifëse për kontratën e vitit 2017 mes BIRN-it dhe RTK-së’, duke konstatuar se janë shkelur kapitujt II dhe IV të Kodit të Mediave të Shkruara të Kosovës të cilët kanë të bëjnë me raportimin e së vërtetës, përkatësisht të drejtën për t’u përgjigjur”.
Pra, përveç se KMSHK tregon se Kallxo.com ka shpifur, aty konfirmohet edhe se është bërë një tjetër shkelje flagrante gjatë raportimit. I është mohuar e drejta për t’u përgjigjur personit që në artikull quhet me termat më të ulëta.
Konfirmimi i shpifjes edhe nga KMSHK është veçse ri-dëshmim i asaj që e them unë vazhdimisht për këtë biznesmene me emrin Jeta Xharra, që për një kohë të gjatë është prezantuar si gazetare.
Ajo, si një diktatore e egër, tash e më shumë se një dekadë mban pozitën e drejtores në një organizatë që, kur i konvenon të aplikojë për fonde, thotë se është OJQ, e kur i duhet të marrë reklama nga bizneset, shndërrohet në sh.p.k. Pra në Biznes. Epoka e këtyre njerëzve po merr fund. Shumë shpejt do të fillojë edhe iniciativa që do ta largojë atë edhe nga pozita e drejtores në BIRN Kosova, sepse BIRN nuk është shtëpia e saj private.
Prandaj, s’mund të qëndrosh dy dekada drejtoreshë në një institucion i cili supozohet të jetë OJQ.
Një shpifëse e konfirmuar si Jeta Xharra nuk mund të vazhdojë ta mbajë atë pozitë, siç ka bërë tash e sa vjet, duke e përdorur për sulme ndaj kundërshtarëve e përfitime personale.
Dhe fatkeqësia e madhe, a e dini ku është?
Në BIRN e në Kallxo ka plot gazetarë të mirë e profesionistë, të cilëve u duhet të vendosen nën shërbim të agjendave personale të Xharrës, e cila ka futur gjithë mekanizmat që i ka në dispozicion në luftën e saj për të pastruar imazhin.
Por, nuk bëhet dot më. Të gjithë e kanë kuptuar e KMSHK e ka konfirmuar: Jeta Xharra shpif, nuk e raporton të vërtetën dhe për më tepër ua mohon njerëzve për të cilët shkruan të përgjigjen.
