Ish-Kryeministri i Kosovës, njëherit ish-Kryetar i LDK-së, Isa Mustafa, ka shprehur dyshimet e tij në lidhje me kushtetutshmërinë e zgjedhjes së Nenad Rashiç-it, nënkryetar të Kuvendit nga radhët e komunitetit serb.
Këto komente, Mustafa i ka bërë në një prononcim për mediumin “Nacionale”, pasi që është pyetur për vendimin e LDK-së që ta votojë Rashiç-in.
“Rezultatet, për aq sa lexova, mu duken të çuditshme. Dyshoj se është zgjedhje kushtetuese”, deklaroi Mustafa.
Abdixhiku pas seancës konstituive ka shpjeguar se pse e votuan Rashiç-in për nënkryetar të Kuvendit.
“Meqenëse aktgjykimi i gjykatës Kushtetuese ka lënë hapësirë për votime edhe të grupeve ose individëve tjerë jashtë një partie të tillë meqenëse kështu ka qenë vendimi, ne kemi konsideruar se për një pozitë tërësisht të parëndësishme parlamentare siç është pozita e pestë të Kuvendit, Kuvendi dhe institucionet e Kosovës duhet të mos bllokohen më. Futemi në afate kushtetuese tani janë rregullat e qarta, ose kemi qeveri ose zgjedhje të reja”, tha Abdixhiku
Ndryshe, Nenad Rashiç është zgjedhur nënkryetar i Kuvendit të Kosovës nga radhët e komunitetit serb. Ai mori 71 vota për, 24 abstenime dhe nëntë kundër.
Zgjedhja e Nenad Rashiçit erdhi pasi që nëntë (9) deputetët e Listës Serbe dështuan radhazi nga tri herë secili për t’i marrë votat e nevojshme.
Lidhja Demokratike e Kosovës dhe Vetëvendosje votuan për, ndërsa Partia Demokratike e Kosovës abstenoi.
