Tridhjetë vjet pasi ndanë për herë të parë ekranin, dy ikonat e Hollywoodit janë rikthyer! Këtë herë, në një reklamë për pallto.
Ju kujtohet ndikimi “bërthamor” që pati filmi Heat i Michael Mann kur doli në vitin 1995. Jo vetëm që ishte formalisht ambicioz dhe tejet me ndikim, por përfaqësonte edhe herën e parë që Al Pacino dhe Robert De Niro ndanin një ekran.
Kjo, më shumë se çdo gjë tjetër, ishte arsyeja kryesore e suksesit të filmit: dy burra që konsideroheshin gjerësisht si aktorët më të mëdhenj që kishin punuar ndonjëherë në kinematografi, përballë njëri-tjetrit në kohë reale. Skena e tyre së bashku në restorant u cilësua si spektakli më i madh në kinema që prej ngjitjes së King Kongut në Empire State Building. Pacino kundër De Niro ishte si Fischer kundër Spassky, Einstein kundër Bohr, Foreman kundër Ali. Sa e rëndësishme ishte ajo përballje.
Epo, tani po shesin pallto.
Siç raporton The Hollywood Reporter, Robert De Niro dhe Al Pacino janë bashkuar për “fushatën e tyre të parë të përbashkët të një marke” në emër të kompanisë luksoze të veshjeve të jashtme Moncler.
Deri më tash, fushata përfshin disa foto bardh e zi të De Niros dhe Pacinos, dhe një video në YouTube me dy karrige bosh, e shoqëruar nga një version i këngës “Lean On Me”, ndërsa aktorët, me zërat e tyre karakteristikë, flasin për shëtitje të gjata dhe biseda të këndshme. Sepse, sipas tyre, një xhaketë Moncler nuk është thjesht një pallto, por është “shprehje miqësie, lidhjeje dhe ngrohtësie njerëzore”.
Robert De Niro dhe Al Pacino janë tashmë në të tetëdhjetat. Ata mbeten dy figura jashtëzakonisht të dashura të kinemasë. Dhe, ndonëse janë aktorë të shkëlqyer, fotot e fushatës tregojnë një ngrohtësi të vërtetë. Kanë dekada histori të përbashkët, dhe kjo duket qartë.
