Deputeti i LDK-së, Ermal Sadiku, ka reaguar pasi disa deputetë të Lëvizjes Vetëvendosje kanë kërkuar dorëheqjen e atyre që kanë votuar për themelimin e Gjykatës Speciale.

Sadiku ka thënë se, nëse po hapet tema e përgjegjësisë politike, atëherë, sipas tij, duhet të fillohet “pak më herët”.

“Disa deputetë të VV-së paskan kërkuar dorëheqjen e atyre që e kanë votuar Gjykatën Speciale.

Në rregull. Atëherë ndoshta është mirë me fillu pak më herët.

Me u dorëheq ata që ishin kundër Rambujesë.

Ata që ishin kundër Pakos së Ahtisaarit.

Ata që e kundërshtonin formimin e shtetin që e kemi sot.

Ata që premtuan Bashkim Kombëtar sapo të vinin në pushtet.

Ata që gjuanin policinë me gurë dhe institucionet e shtetit me molotov.

Nëse po hapim temën e përgjegjësisë politike po fillojmë me themelet”, ka shkruar Sadiku.

Reagimi i tij vjen pas kërkesave nga deputetë të VV-së për përgjegjësi politike ndaj atyre që votuan për Gjykatën Speciale.