Në shtator të vitit 2010, Fatmir Sejdiu dha dorëheqje nga posti i Presidentit të Republikës së Kosovës, pas një vendimi të Gjykatës Kushtetuese të Kosovës, e cila konstatoi se ai kishte shkelur aktin më të lartë juridik duke mbajtur njëkohësisht edhe funksionin e kryetarit të Lidhjes Demokratike të Kosovës. Sipas Kushtetutës, Presidenti duhet të jetë figurë neutrale dhe mbi partitë politike, prandaj ky vendim krijoi një krizë të thellë institucionale dhe politike.

Pas zgjedhjeve, në vitin 2011, nga koalicioni PDK–AKR, Kuvendi i Kosovës zgjodhi Behgjet Pacollin President të vendit. Megjithatë, procesi u kontestua ashpër nga opozita dhe më pas u rrëzua sërish nga Gjykata Kushtetuese, e cila konstatoi se zgjedhja e Pacollit ishte bërë në kundërshtim me Kushtetutën, për shkak të mungesës së kuorumit dhe procedurave jo të rregullta në Kuvend. Si rezultat, Pacolli u detyrua të japë dorëheqje vetëm disa javë pas zgjedhjes.

Për të dalë nga ngërçi institucional dhe për të shmangur destabilizimin e mëtejmë politik, po në vitin 2011 u arrit një marrëveshje e gjerë ndërpartiake, e mbështetur edhe nga faktori ndërkombëtar. Rrjedhimisht, Atifete Jahjaga u zgjodh Presidente e Republikës së Kosovës si figurë konsensuale.

Në vitin 2016, pas përfundimit të mandatit të Jahjagës, Kuvendi i Kosovës zgjodhi Hashim Thaçin President të vendit. Zgjedhja e Thaçit u shoqërua me tensione të mëdha politike, protesta të opozitës dhe kundërshtime publike, por procesi institucional u përmbyll dhe ai e ushtroi mandatin deri në vitin 2020.

Në nëntor të vitit 2020, Hashim Thaçi dha dorëheqje nga posti i Kryetarit të Shtetit, pasi ndaj tij u konfirmua aktakuza nga Dhomat e Specializuara të Kosovës në Hagë.

Në vitin 2021, pas zgjedhjeve parlamentare dhe formimit të institucioneve të reja, Kuvendi i Kosovës zgjodhi Vjosa Osmani Presidente të Republikës. Zgjedhja e saj u bë me shumicë të mjaftueshme votash.

Mandati aktual i saj skadon më 4 prill, ndërsa afati për zgjedhjen e presidentit të ri është 4 marsi – në të kundërtën, zgjedhjet e reja parlamentare duhet të mbahen brenda 45 ditësh.