Albin Kurti u bë lajm i mëngjesit, kur u pa në sallën e gjyqit në Gjykatën Themelore të Prishtinës.
Ai shkoi aty, i shoqëruar nga truprojat, për të marrë pjesë në seancën gjyqësore ndaj ish-kreut të Organizatës së Veteranëve të Luftës, Faton Klinaku, i cili akuzohet për kanosje ndaj kryeministrit Kurti.
Por dikur, thirrjet e sistemit të drejtësisë për paraqitje – qoftë edhe si dëshmitar – Kurti i përshkruante si “skena filmi” kundër tij dhe kundër Kosovës.
Para disa muajsh, në një emision që nuk transmetohet më, të drejtuar nga ish-këshilltari i tij Shkëlzen Gashi dhe ish-zyrtari i VV-së, Rron Gjinovci, kryeministri në detyrë kishte deklaruar se prokuroria synonte të prodhonte një lajm ndërkombëtar.
“Unë besoj që pikërisht ky prokurori Isufaj është regjisori i një pamjeje ku unë hyj në Prokurorinë e Shtetit dhe prodhohet një lajm ndërkombëtar, ‘Kryeministri i Kosovës intervistohet për një rast korrupsioni’. Aty nuk thuhet se është si dëshmitar – ky është qëllimi”, kishte deklaruar ai.
Sulmet ndaj çdo shkalle të sistemit gjyqësor – nga vetë Kurti dhe njerëzit e partisë së tij – janë të shpeshta.
Kurti kishte sulmuar prokurorinë kur arrestoi drejtorin e KEK-ut, Nagip Krasniqin, i akuzuar për korrupsion. Të njëjtën qasje kishte edhe ndaj Gjykatës Supreme, për vendimet rreth certifikimit të Listës Serbe, si dhe ndaj Gjykatës Kushtetuese, në rastet e aktgjykimeve për bllokadën institucionale.
