Zëdhënësi i Aleancës, Kushtrim Xhemajli, ka kërkuar nga Qeveria e Kosovës të sqarojë nëse përfaqësuesit e Listës Studentore nga Serbia kanë marrë leje për të hyrë në Kosovë dhe kush ua ka mundësuar vizitën.
Në një reagim në facebook Xhemajli ka kritikuar deklaratat e ministrit për Komunitete dhe Kthim, Nenad Rashiç, i cili një ditë më parë ishte shprehur optimist për bashkëpunimin me Listën Studentore dhe gatishmërinë e Qeverisë së Kosovës për të ecur drejt themelimit të Asociacionit të Komunave me Shumicë Serbe.
Sipas Xhemajlit, Rashiç e kishte përshkruar fitoren e kësaj liste si një kthesë “historike e pothuajse revolucionare”, ndërsa kishte kërkuar që çështja e njohjes së Kosovës nga Serbia të lihej anash për momentin.
Ai ka vënë në pikëpyetje këtë optimizëm, duke rikujtuar qëndrimet e Listës Studentore ndaj Kosovës, të cilën kjo listë e konsideron “pjesë përbërëse të Serbisë”.
“Dhe sot, pa kaluar as 24 orë nga ato deklarata, udhëheqësit e rinj të Beogradit zbarkuan në Kosovë”, ka shkruar Xhemajli.
Ai ka ngritur pikëpyetje edhe për ligjshmërinë dhe procedurat e vizitës së delegacionit.
“A e kanë shkelur ligjin dhe protokollet shtetërore me këtë vizitë? A kanë kërkuar dhe kush u dha atyre leje?”, ka pyetur ai.
Xhemajli ka thënë se Lista Studentore nuk duhet të paraqitet si një alternativë e re politike pa u marrë parasysh qëndrimet e saj për Kosovën.
Në reagim, ai ka kërkuar nga Qeveria të sqarojë nëse ka ndryshuar qëndrimin për Asociacionin dhe nëse deklaratat e Rashiçit paraqesin fillimin e pranimit të kushteve të Beogradit.
“A ka ndryshuar zyrtarisht qëndrim për këtë çështje? A është ky fillimi i pranimit në heshtje të kushteve të Beogradit të ri?”, ka përfunduar Xhemajli.









