Agim Pllashniku, veteran i UÇK-së, është larguar nga puna në ndërmarrjen publike “Ibër Lepenc”, me vendim të kryeshefit ekzekutiv, Faruk Mujka – eksponent i Vetëvendosjes.
Vendimi u mor më 31 korrik, disa ditë pasi Pllashniku protestoi kundër deputetes së VV-së, Fitore Pacolli. Ai e përballi ligjvënësen me faktin se familjarët e saj – përfshirë bashkëshortin – kanë përfituar grante dhe subvencione nga pushteti. Të njëjtën ditë, ai ishte ndaluar nga Policia për intervistim.
Familjarët e Pacollit kanë përfituar gjithsej 252 mijë euro nga shteti: 100 mijë daja, 100 mijë vëllai dhe së fundmi 52 mijë euro bashkëshorti – për të cilin raportoi VOX Kosova më 23 korrik.
