Të hënën e 26 janarit, Fondacioni Jahjaga ka nisur projektin Rrjeti i Grave në Sektorin e Sigurisë në Kosovë, që sipas ish presidentes së Kosovës, Atifete Jahjaga, shënon një hap të rëndësishëm në fushën e sigurisë dhe Agjendës së Grave, Paqes dhe Sigurisë.
“Sot, Fondacioni Jahjaga shënoi një hap të rëndësishëm në fushën e sigurisë duke lansuar Rrjetin e Grave në Sektorin e Sigurisë në Kosovë”, ka njoftuar Jahjaga.
Projekti është mbështetur nga Mbretëria e Holandës dhe është zyrtarizuar pas memorandumeve të mirëkuptimit mes Fondacionit të ish presidentes dhe institucioneve të ndryshme të sigurisë në Kosovë.
“Ky projekt i mbështetur nga Mbretëria e Holandës u formalizua nëpërmjet nënshkrimit të memorandumeve të mirëkuptimit mes Fondacionit Jahjaga të përfaqësuar nga Drejtoresha Ekzekutive znj. Bexheti me Forcën e Sigurisë së Kosovës, Policinë e Kosovës, Inspektoratin Policor të Kosovës, Shërbimin Korrektues të Kosovës si dhe Asociacioni e Komunave të Kosovës”, ka deklaruar ish kryetarja e Kosovës.
Jahjaga ka potencuar se nisma është në linjë me rezolutën 1325 të Organizatës së Kombeve të Bashkuara dhe për synim ka fuqizimin e bashkëpunimit profesional, ndarjes së përvojave dhe rolin e grave në institucionet e sigurisë.
