Një gjykatë apeli në Francë e la në fuqi të martën dënimin ndaj Marine Le Pen për keqpërdorim të fondeve të Bashkimit Evropian, por ia shkurtoi ndalimin për të kandiduar në poste publike, duke i lënë teorikisht të hapur rrugën për të garuar në zgjedhjet presidenciale të vitit 2027.

Megjithatë, gjykata e dënoi Le Pen edhe me tre vjet burg – dy prej tyre me kusht dhe një vit nën mbikëqyrje elektronike me byzylyk në kyçin e këmbës. Ky dënim mund ta bëjë politikisht dhe praktikisht të vështirë zhvillimin e një fushate presidenciale.

Tashmë i mbetet vetë Le Pen të vendosë nëse do të kandidojë për t’u bërë presidentja e parë e ekstremit të djathtë në historinë moderne të Francës. Ajo pritet të japë një intervistë në orarin kryesor televiziv në TF1 në orën 20:00 sipas kohës lokale, ku mund të njoftojë vendimin për të ardhmen e saj politike.

Le Pen kishte deklaruar më herët se do ta kishte të vështirë të zhvillonte një fushatë presidenciale ndërsa vuan një dënim me mbikëqyrje elektronike, duke argumentuar se kjo do ta pengonte fushatën dhe do ta dëmtonte besueshmërinë e saj. Megjithatë, ajo ende nuk ka konfirmuar se çfarë do të bëjë.

Teksa largohej nga salla e gjyqit, Le Pen buzëqeshte, por nuk bëri asnjë koment. Më pas ajo shkoi në selinë e partisë së saj, Rassemblement National (RN), për të diskutuar hapat e ardhshëm.

Le Pen ishte shpallur fajtore në mars të vitit 2025 për përvetësim fondesh dhe ishte ndaluar për pesë vjet, me efekt të menjëhershëm, të mbante poste publike, duke i pamundësuar kandidimin e saj të katërt për presidencën.

Vendimi i apelit i së martës, sipas të cilit Le Pen nuk mund të mbajë poste publike për 45 muaj, prej të cilëve 30 janë me kusht, do të thotë se ajo do të ketë të drejtë të kandidojë kur francezët të votojnë në prill të vitit 2027, pasi tashmë ka kryer 15 muaj të ndalimit që kishte nisur të zbatohej pas vendimit të vitit të kaluar.

Fushatë me byzylyk elektronik

Vendimi pritet të shkaktojë debat të fortë brenda RN-së, e cila prej muajsh është përgatitur për dy skenarë të mundshëm: një me Marine Le Pen si kandidate dhe një tjetër me presidentin e partisë, Jordan Bardella.

Byzylyku elektronik është pjesë e dënimit të zbutur me burg dhe do të thotë se Le Pen nuk do të duhet të vuajë dënimin në burg.

Një gjyqtar për ekzekutimin e dënimit do të përcaktojë kushtet e mbikëqyrjes elektronike, duke vendosur oraret kur Le Pen mund të largohet nga shtëpia dhe kohën kur duhet të kthehet çdo mbrëmje. Kufizimet gjatë fundjavave zakonisht janë më të rrepta.

Një burim gjyqësor tha se byzylyku elektronik ka të ngjarë ta vështirësojë një fushatë presidenciale në mbarë vendin, pasi Le Pen do të duhet të kthehet në shtëpi çdo natë, por ndoshta nuk do ta bëjë atë të pamundur. Sipas të njëjtit burim, ajo mund të kërkojë edhe heqjen e byzylykut pas disa muajsh, nëse tregon sjellje të mirë.

Marine Le Pen, udhëheqëse e partisë nacionaliste dhe kundër emigracionit Rassemblement National, u shpall fajtore për përvetësim fondesh në një çështje që lidhej me fondet e Bashkimit Evropian. Dënimi i saj përfshin edhe ndalimin pesëvjeçar për të mbajtur poste publike, me efekt të menjëhershëm.

Sondazhet kanë treguar vazhdimisht se si Le Pen, ashtu edhe Jordan Bardella, janë kandidatë të fortë për të kaluar në raundin e dytë të zgjedhjeve presidenciale. Madje, disa anketa të fundit sugjerojnë se Bardella do të kishte rezultat më të mirë se Le Pen në raundin e parë.

Dënimi i Le Pen lidhet me akuzat se figura të RN-së kanë keqpërdorur fondet e Parlamentit Evropian, të destinuara për asistentët parlamentarë, duke i përdorur ato për të paguar punonjës të partisë në Francë. Në vitin 2025, gjyqtarët arritën në përfundimin se Le Pen kishte luajtur një rol qendror në këtë skemë, një përfundim që ajo e ka kundërshtuar vazhdimisht.

Vendimi fillestar shkaktoi reagime të ashpra nga aleatët e Le Pen në Francë dhe jashtë saj, të cilët akuzuan sistemin gjyqësor se po ndërhynte në garën demokratike. Kundërshtarët e saj, ndërkaq, argumentuan se zyrtarët e zgjedhur duhet t’i nënshtrohen të njëjtave standarde ligjore si çdo qytetar tjetër.

“Ajo që është thelbësore për ne, dhe që e kemi thënë prej vitesh, është se ata kanë përvetësuar, kanë vjedhur para publike – paratë e taksapaguesve evropianë,” u tha gazetarëve avokati i Parlamentit Evropian, Patrick Maisonneuve. “Kjo tashmë është konfirmuar për herë të dytë: fillimisht nga gjykata e shkallës së parë dhe sot nga Gjykata e Apelit.”